ಹೋವ್ (ಇಂಗ್ಲೆಂಡ್): ಭಾರತ ಅಂಡರ್-19 ತಂಡ, ಇಂಗ್ಲೆಂಡ್ ಪ್ರವಾಸವನ್ನು ಗೆಲುವಿನೊಂದಿಗೆ ಆರಂಭಿಸಿದೆ. ಹೋವ್‌ನ ಕೌಂಟಿ ಮೈದಾನದಲ್ಲಿ ಶುಕ್ರವಾರ ನಡೆದಿದ್ದ ಮೊದಲನೇ ಯೂತ್ ಏಕದಿನ ಪಂದ್ಯದಲ್ಲಿ(IND vs ENG) ಆಯುಷ್ ಮ್ಹಾತ್ರೆ (Ayush Mahtre) ನಾಯಕತ್ವದ ಭಾರತ-19 ತಂಡವು ಇಂಗ್ಲೆಂಡ್ ಅಂಡರ್-19 ತಂಡವನ್ನು 6 ವಿಕೆಟ್‌ಗಳಿಂದ ಸೋಲಿಸಿತು. ಮೊದಲು ಬ್ಯಾಟ್‌ ಮಾಡಿದ ಇಂಗ್ಲೆಂಡ್ ತಂಡ ಕೇವಲ 174 ರನ್‌ಗಳನ್ನು ಗಳಿಸಿತು. ತಂಡದ ಇನಿಂಗ್ಸ್ 43ನೇ ಓವರ್‌ನಲ್ಲಿ ಕೊನೆಗೊಂಡಿತು. ಭಾರತ ಕೇವಲ 24 ಓವರ್‌ಗಳಲ್ಲಿ ಪಂದ್ಯವನ್ನು ಗೆದ್ದುಕೊಂಡಿತು. ಪ್ರವಾಸದಲ್ಲಿ ಭಾರತ 5 ಯೂತ್ ಏಕದಿನ ಪಂದ್ಯಗಳು ಮತ್ತು 2 ಯೂಥ್‌ ಟೆಸ್ಟ್‌ಗಳನ್ನು ಆಡಲಿದೆ.
ಓಪನರ್ ವೈಭವ್ ಸೂರ್ಯವಂಶಿ ಭಾರತ ತಂಡಕ್ಕೆ ಬಿರುಗಾಳಿಯ ಆರಂಭವನ್ನು ನೀಡಿದರು. ನಾಯಕ ಆಯುಷ್ 30 ಎಸೆತಗಳಲ್ಲಿ 21 ರನ್‌ಗಳ ಇನಿಂಗ್ಸ್ ಆಡಿದರೆ, ವೈಭವ್ ಕೇವಲ 19 ಎಸೆತಗಳಲ್ಲಿ 48 ರನ್ ಗಳಿಸಿದರು. ಅವರ ಇನಿಂಗ್ಸ್‌ನಲ್ಲಿ ಅವರು 5 ಸಿಕ್ಸರ್‌ಗಳು ಮತ್ತು 2 ಬೌಂಡರಿಗಳನ್ನು ಬಾರಿಸಿದರು. ಭಾರತ ತಂಡ ಬ್ಯಾಟಿಂಗ್ ಪವರ್‌ಪ್ಲೇನಲ್ಲಿಯೇ 86 ರನ್‌ಗಳನ್ನು ಗಳಿಸಿತು. ಇಬ್ಬರೂ ಆರಂಭಿಕರು ಪವರ್‌ಪ್ಲೇಯಲ್ಲಿಯೇ ಔಟಾಗಿದ್ದರು. ಇದಾದ ನಂತರ, ವಿಹಾನ್ ಮಲ್ಹೋತ್ರಾ 18 ಮತ್ತು ಮೌಲ್ಯರಾಜ್ ಸಿಂಗ್ ಚಾವ್ಡಾ 16 ರನ್ ಗಳಿಸಿದರು. ಕೊನೆಯಲ್ಲಿ, ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್ ಅಭಿಗ್ಯಾನ್ ಕುಂಡು 34 ಎಸೆತಗಳಲ್ಲಿ ಅಜೇಯ 45 ರನ್ ಗಳಿಸಿ ತಂಡವನ್ನು ಗುರಿಯತ್ತ ಕೊಂಡೊಯ್ದರು.
IND vs ENG: ಭಾರತ ತಂಡದ ಬೌಲಿಂಗ್‌ ವಿಭಾಗವನ್ನು ಟೀಕಿಸಿದ ಮೊಹಮ್ಮದ್ ಶಮಿ!
ಇದಕ್ಕೂ ಮುನ್ನ ಟಾಸ್ ಗೆದ್ದ ನಂತರ, ಥಾಮಸ್ ರೆಯು ನಾಯಕತ್ವದ ಇಂಗ್ಲೆಂಡ್ ಅಂಡರ್-19 ತಂಡವು ಮೊದಲು ಬ್ಯಾಟ್‌ ಮಾಡಲು ನಿರ್ಧರಿಸಿತು. ಆರಂಭಿಕರಾದ ಬಿಜೆ ಡಾಕಿನ್ಸ್ ಮತ್ತು ಐಸಾಕ್ ಮೊಹಮ್ಮದ್ ಉತ್ತಮ ಆರಂಭ ನೀಡಿದರು. ಮೊದಲ 10 ಓವರ್‌ಗಳಲ್ಲಿ ತಂಡವು ಒಂದು ವಿಕೆಟ್ ನಷ್ಟಕ್ಕೆ 62 ರನ್ ಗಳಿಸಿತು. ಮೊಹಮ್ಮದ್ ಆಕ್ರಮಣಕಾರಿಯಾಗಿ ಬ್ಯಾಟಿಂಗ್ ನಡೆಸುತ್ತಿದ್ದರು. 28 ಎಸೆತಗಳಲ್ಲಿ 42 ರನ್‌ಗಳ ಇನಿಂಗ್ಸ್ ಆಡಿದ ನಂತರ, ಅವರನ್ನು ಮೊಹಮ್ಮದ್ ಇನಾನ್ ಔಟ್ ಮಾಡಿದರು. ಇದರ ನಂತರ, ಭಾರತ ತಂಡ ಪಂದ್ಯದ ಮೇಲೆ ಹಿಡಿತ ಸಾಧಿಸಲು ಪ್ರಾರಂಭಿಸಿತು.
ಲೆಜೆಂಡರಿ ಆಲ್‌ರೌಂಡರ್ ಆಂಡ್ರ್ಯೂ ಫ್ಲಿಂಟಾಫ್ ಅವರ ಪುತ್ರ ರಾಕಿ ಫ್ಲಿಂಟಾಫ್ ಒಂದು ತುದಿಯನ್ನು ಗಟ್ಟಿಯಾಗಿ ನಿಂತಿದ್ದರು. ಆದರೆ ಇನ್ನೊಂದು ತುದಿಯಿಂದ ವಿಕೆಟ್‌ಗಳು ಬೀಳುತ್ತಲೇ ಇದ್ದವು. ಕೊನೆಯ 7 ಬ್ಯಾಟ್ಸ್‌ಮನ್‌ಗಳಲ್ಲಿ ಒಬ್ಬರು ಮಾತ್ರ ಎರಡಂಕಿ ತಲುಪಲು ಸಾಧ್ಯವಾಯಿತು. 56 ರನ್‌ಗಳ ಇನಿಂಗ್ಸ್ ಆಡಿದ ನಂತರ ರಾಕಿ ಕೊನೆಯ ಬ್ಯಾಟ್ಸ್‌ಮನ್ ಆಗಿ ಔಟಾದರು. ಭಾರತ ಪರ, ಕನಿಷ್ಕ್ ಚೌಹಾಣ್ 10 ಓವರ್‌ಗಳಲ್ಲಿ 20 ರನ್‌ಗಳಿಗೆ 3 ವಿಕೆಟ್ ಪಡೆದರು. ಮೊಹಮ್ಮದ್ ಇನಾನ್, ಆರ್‌ಎಸ್ ಅಂಬ್ರೀಶ್ ಮತ್ತು ಹೆನಿಲ್ ಪಟೇಲ್ ತಲಾ 2 ವಿಕೆಟ್ ಪಡೆದರು.
